Tymor newydd o Gweithdai GIFs i Ysgolion

Mae heddiw’n nodi diwrnod cyffrous, wrth i’r llyfr archebion ar gyfer tymor yr hydref o Gweithdai GIFs i Ysgolion Mwydro agor yn swyddogol.

Ers dros flwyddyn mae’r cwmni darlunio digidol o Gaernarfon, Mwydro, wedi bod yn teithio i bron i 100 o ysgolion hyd a lled Cymru i ddod a’r iaith Gymraeg, Hanes a Thechnoleg Gwybodaeth ynghyd mewn un gweithdy hwyl a rhyngweithiol.

Mae’r gweithdai, wedi eu anelu at ddisgyblion Blwyddyn 5 a 6, yn cynnig y cyfle i ddisgyblion dathlu eu iaith a’u milltir sgwâr drwy ddylunio GIF o Enw Lle Cymraeg o’u dewis a bydd wedyn yn cael ei osod yn y bar chwilio GIFs cyhoeddus i bawb ddefnyddio ar Instagram, Snapchat, TikTok, WhatsApp a mwy.

Mae’r prosiect yn un sy’n gweddu’n gryf gyda’r thema drawsgwricwlaidd o’r Cwricwlwm i Gymru o gyd-destunau lleol, cenedlaethol a rhyngwladol a’n cynnig cyfle cyffrous i ddysgu sgil newydd oll o fewn sesiwn dwy awr hwyl.

Meddai Sioned Young, sylfaenydd Mwydro ac enillydd Gweithiwr Llawrydd Ifanc y Flwyddyn IPSE;

“Dwi a fy nghynorthwyydd Tesni wrth ein boddau yn teithio Cymru gyda’m Gweithdai GIFs i Ysgolion. Mae gweld faint o hwyl mae’r disgyblion ac athrawon yn cael, a’r balchder ar eu hwynebau ar ddiwedd y sesiwn wedi iddynt greu darn o gelf i ddathlu eu milltir sgwâr yn deimlad arbennig.”

Darperir y gweithdai drwy gyfrwng y Gymraeg, Saesneg neu’n Ddwyieithog ym mhob rhan o Gymru. Gellir cynnal gweithdai mewn person i ysgolion yn Ynys Môn, Gwynedd a Chonwy, neu’n rhithiol i ardaloedd tu hwnt i’r rheiny.

O fewn gweithdy caiff disgyblion cyfle i greu darluniadau hwyl fel rhain o’u milltir sgwâr

Dros dymor yr haf eleni bu Mwydro’n gweithio ar y cyd gyda Cyngor Sir Penfro i ddarparu Gweithdai GIFs rhithiol i bob ysgol yn y sir. Dywed Catrin Phillips, Swyddog Datblygu’r Gymraeg. Cyngor Sir Penfro;

“Fel sir, gwnaethom ofyn i Mwydro weithio gyda’n hysgolion i gyflwyno gweithdai darlunio digidol er mwyn cefnogi gwaith y Siarter Iaith a dathlu enwau lleoedd Sir Benfro. Mae wedi bod yn bleser i weithio gyda Sioned wrth drefnu’r prosiect gyda’i hagwedd hawddgar a phroffesiynol.

Mae’r adborth gan ysgolion wedi bod yn hynod gadarnhaol, gyda’r plant yn mwynhau’r sesiynau’n fawr. Mae’r prosiect nid yn unig yn hybu sgiliau iaith Gymraeg ond hefyd yn meithrin ymdeimlad o falchder a pherthyn i’w cynefin.

Rydyn ni’n falch iawn o’r GIFs terfynol a byddant yn siŵr o ehangu’r defnydd o’r Gymraeg ar gyfryngau cymdeithasol ymhlith rhieni ac ymwelwyr. Rydyn ni’n ffodus iawn o waith Mwydro a’n disgyblion wrth roi lleoedd hardd Sir Benfro yn gadarn ar y map ac ar y we! Rwy’n annog unrhyw ysgol neu sir yn fawr i gymryd rhan yn y fenter wych hon.”

Am ragor o wybodaeth neu i drefnu sesiwn, cysylltwch ar info@mwydro.com